මව/පියා හෝ දෙදෙනාම, එක් දරුවෙකුට වඩා තවත් දරුවෙකුට පමණක් අනිසි පක්ෂපාතකමක් පෙන්වීම නැතිනම් විශේෂ සැලකිලි දැක්වීම බොහෝ පවුල්වල දක්නට ලැබෙන දෙයක් වුනත් එය පවුල් තුළ සාමයට හානි පමුණුවන බරපතල කරුණකි. මෙය දෙමාපියන්ගේ අනිසි ලැදියාව ලබන සහ නොලබන දරුවන් යන දෙඅංශයටම ගැඹුරු සහ කල්පවත්නා බලපෑමක් ඇති කළ හැකි අතර, වැඩිහිටි විය දක්වාම ඔවුන්ගේ මානසික සෞඛ්‍යය, ආත්ම අභිමානය සහ අන්තර් පුද්ගල සම්බන්ධතාවලට බලපෑම් ඇති කරයි.
අනිසි පක්ෂපාතකමක් ලබන දරුවන්ට වන බලපෑම
පවුලේ හැමදෙනාම කැමති දරුවා වීම දරුවාගේ පැත්තෙන් බැලූවිට ඔවුනට ප්‍රයෝජනවත් විය හැකි නමුත්, මෙම තත්ත්වය බොහෝ විට සැඟවුණු අභියෝග ගෙන එයි. පවුලේ හැමෝම කැමති දරුවන් ඕනෑම මොහොතක තමන්ගේ වරප්‍රසාද අහිමි විය හැකි යැයි සිතමින් බියෙන් කාංසාවෙන් පෙළෙන අතර සහ අනාරක්ෂිත හැඟීමක් වර්ධනය කරගනී. ඔවුන් තම දෙමාපියන්ගේ යථාර්ථවාදී නොවන අපේක්ෂාවන් ඉටු කිරීම සඳහා අරගලයේ යෙදෙන අතර, එය ඔවුන්ගේ ජීවිතයේ සැලකිය යුතු පීඩනයකට හා ආතතියට හේතු විය හැක. වැඩිහිටියන් විසින්, මෙම දරුවන් සෑම විටම පවුල තුළ ඉහළ කොට තබා ඇති බැවින්, ජීවිතයේදී මුහුණ දෙන්නා වූ අසාර්ථක වීම් හෝ ප්‍රතික්ෂේප කිරීම් සමඟ කටයුතු කිරීම ඔවුන්ට අභියෝගයක් විය හැකිය. එපමණක් නොවේ, ඔවුන්ගේ සහෝදර සහෝදරියන් අතර කාලාන්තර අමනාපය පවුල් බැඳීම් බිඳ දැමිය හැකි අතර, ඔවුන් හා එක්ව සහයෝගීව කටයුතු කිරීම, ශක්තිමත් සහෝදර බැඳීම් ඇති කර ගැනීමට අපහසු වේ.
විශේෂ ලැදියාවක් නොලබන දරුවන්ට වන බලපෑම
දෙමාපියන්ගේ විශේෂ සැලකිලි නොලබන දරුවන් මෙහිදී වඩාත් දැඩි අභියෝගවලට මුහුණ දෙයි. තමන්ගේ සහෝදර සහෝදරියන් සමඟ තමාව නිරන්තරයෙන් සංසන්දනය කිරීම හේතුවෙන් ඔවුන් බොහෝ විට අඩු ආත්ම අභිමානයක් පෙන්නුම් කරමින්, තමා ප්‍රමාණවත් නොවේ යන හැඟීම් සහ මානසික අවපීඩනය අත්විඳිති. දෙමාපියන් විසින් නොසලකා හැරීමේ මෙම හැඟීම ඔවුන්ගේ ජීවිතයේ දිගුකාලීන චිත්තවේගීය හා මානසික ගැටළු වලට තුඩු දිය හැකිය. දෙමාපිය සැලකිල්ල නොලබන දරුවන් ඔවුන්ගේ වැඩිහිටි ජීවිතයටද මෙම තමා වටින්නේ නැත, තමන්ගෙන් වැඩක් නැත යන හැඟීම් රැගෙන යන අතරම අධ්‍යාපනික කටයුතුවලදී සහ ඔවුන්ගේ පෞද්ගලික සබඳතාවලදී ද විවිධ ගැටලුවලට මුහුණ දෙයි. මෙහි දරුණුතම අවස්ථාවන්හිදී, ඔවුන් දැඩි ස්වාධීන දෘෂ්ටිකෝණයක් සහ දැඩි ස්වාධීන හැඟීම් වර්ධනය කර ගත හැකි අතර, තවදුරටත් ප්‍රතික්ෂේප වීම වළක්වා ගැනීම සඳහා අන් අයගෙන් ඈත් විය හැකිය.
පවුලෙහි ස්වභාවය සහ දිගු කාලීන ප්‍රතිවිපාක
දෙමාපියන්ගේ විශේෂ සැලකිල්ල එක් දරුවෙකුට පමණක් තනි තනිව බලපාන්නේ නැත. එය සමස්ත පවුලේම ගතිකත්වය කඩාකප්පල් කරයි. දෙමව්පියන්ගේ අවධානය සහ සෙනෙහස සඳහා දරුවන් නිතරම එකිනෙකා හා තරඟ කරන බැවින් සහෝදර සබඳතා බොහෝ විට පලුදු වේ. දරුවන් අතර මෙම තරඟය දිගුකාලීන එදිරිවාදිකම් හා අමනාපකම් ඇති කළ හැකිය. තවද, ළමා වියේදී එක් දරුවෙකුට විශේෂ ලැදියාවක් දක්වන දෙමාපියන් බොහෝ විට මෙම හැසිරීම දරුවන්ගේ වැඩිහිටි විය දක්වාම දිගටම රැගෙන යන අතර, පවුල් ගැටලු උග්‍ර කරමින් සහ අහිතකර පවුල් සංස්ථාවන් නිර්මාණය කරයි.
පර්යේෂණවලින් පෙනී යන්නේ තම දරුවන්ට සමානව සැලකීමට උත්සාහ කරන දෙමාපියන්ගේ පවුල්වලට සාපේක්ෂව එක් දරුවෙකුට පමණක් විශේෂ සැලකිලි දක්වන පවුල්වල දරුවන්ගේ සමස්ත යහපැවැත්ම නරක අතට හැරෙන බවයි. කෙටි කාලීනව ප්‍රතිලාභ ලබන දෙමාපියන්ගෙන් විශේෂ සැලකිලි ලබන දරුවන් පවා, ඔවුන් මුහුණ දෙන සහෝදර සතුරුකම් සහ ඉහළ අපේක්ෂාවන් නිසා අවසානයේ විවිධ අභියෝගවලට මුහුණ දෙයි.
දෙමාපියන් සඳහා උපායමාර්ග
දෙමාපියන් විසින් විශේෂ සැලකිලි දැක්වීමෙන් ඇතිවන ඍණාත්මක බලපෑම් අවම කිරීම සඳහා, සැසඳීම්වලින් තොරව සෑම දරුවෙකුටම සාධාරණ ලෙස සැලකීමට සහ ඔවුන්ගේ විවිධ අවශ්‍යතා සහ ශක්තීන් හඳුනා ගැනීමට දෙමාපියන් උත්සාහ කළ යුතුය.
- දැනුවත්භාවය සහ ආවර්ජනය: දෙමාපියන් විසින් තම හැසිරීම් ගැන නිරතුරුව මෙනෙහි කළ යුතු අතර එක් දරුවෙකුට වඩා තවත් දරුවෙකුට අනවශ්‍ය ලෙස දැඩි ලැදියාවක් දැක්වීමේ හැසිරීම් රටා හඳුනාගත යුතුය.
- සමාන අවධානය: පවුල තුළ සෑම කෙනෙකුම අගය කරන බව සහතික කිරීම සඳහා නිරතුරුව දරුවන් අතර ඔබේ අවධානය සහ වගකීම් මාරුවෙන් මාරුවට ලබා දෙන්න.
- සන්නිවේදනය: අම්මා/තාත්තා එක්කෙනෙකුට විශේෂ සැලකිලි දක්වනවා යැයි දරුවන් අතර ඇතිවන වරදවා වටහාගැනීම් සහ අමනාපය සමනය කිරීම සඳහා දරුවන් සමඟ ඒ එක් එක් අවස්ථාව පිලිබඳ හේතු විවෘතව සාකච්ඡා කරන්න.
- පුද්ගල ප්‍රශංසාව: සංසන්දනාත්මකව නොව එක් එක් දරුවාගේ ජයග්‍රහණ සහ ගුණාංග තනි තනිව පිළිගනිමින් සැමරීම
දෙමාපියන්ගේ විශේෂ ලැදියාව, පවුලේ සමගිය කඩාකප්පල් කරමින් දරුවන්ගේ පුද්ගල යහපැවැත්මට බලපෑම් ඇති කරමින්, දෙමාපිය සැලකිල්ල ලබන සහ අනුග්‍රහය නොලබන දරුවන්ට දෙපිරිසටම දිගුකාලීන හානිකර බලපෑම් ඇති කළ හැකිය. දෙමව්පියන්ට ඔවුන්ගේ හැසිරීම් පිළිබඳව දැනුවත්ව අවබෝධයෙන් සිටීමෙන් සහ වැඩිහිටියන් ලෙස පවුල තුළ සාධාරණත්වය ප්‍රවර්ධනය කිරීම සඳහා උත්සාහ කිරීමෙන් සහයෝගීමත් සහ වඩාත් සහායක පවුල් පරිසරයක් නිර්මාණය කිරීමට හැකිය.
